موجوده فى المنتدى ومش مكرره بس ( اخر فنتكه)

[قمر وخالد للا بد]

ههههههههههههههههه

الله يخليكى عشوووقه

ربنا يستر والبنات يصحصحوا

[قمر وخالد للا بد]

الجزء ( 2 ) : للحب عنوان


ملخص أهم أحداث الجزء السابق: طلعت نتيجه فحص هند سلبيه.. أي انه ماشي علاج لحالتها الصحيه لأنه مكان الثقب يشكل خطر عليها اذا تعرضت لعمليه اخرى.. هادف ارتكب جريمه في حق ربيعه بعد ضرابه دارت بينه وبين محمد.. وسلطان تولى الموضوع .. نشوف شو سوى سلطان

طلع سلطان من البيت وراح صوب المركز.. وناصر حبس عمره في الغرفه وقاعد يتريا اتصال سلطان وكل شوي حد من ربع هادف يتصل لناصر.. وهو اعصابه تلفانه.. ناصر صحيح انه في عمر المراهقه الا انه له شخصيه قويه .. وفي نفس الوقت انسان في غايه الإحترام.. الكل يحبه.. اساتذته .. واهله وربعه.. محبوب من قبل الكل.. وأهم من هذا كله كان متفوق جدا.. ربع هادف ماكانوا يحبونه ليش انه كان يحاول دايما يبعد هادف منهم.. الي كانوا مستغلينه لمصالحهم الشخصيه.. كانوا دوم يستهزئون فيه .. تم ناصر في هاللحظات يتذكر وحده من المواقف الي كانت اتصير له في المدرسه مع ربع هادف..
في يوم من الأيام وصل ناصر ساحة المدرسه وسوء حظه ان الشله الصايعه كانت جدامه حميد وعيسى وحمد وعلي
حميد: جماعه جماعه وصل وصل دلوعة الماما يقصدون خالد ...
علي: يالله خل نضحك شوي على الصبح
يمر ناصر من عندهم.......
ناصر: السلام عليكم
حميد يرد عليه بسخريه : وعليكم.............
عيسى: السلام
حمد: ورحمة الله
علي: وبركاته
ويضحكون
ناصر: الله يهديكم بس
حميد: حمد لله الله هادني شو شايفني مع ويهك
عيسى: اسكت عنه .. شو تبا فيه ... الحين بتفلسف علينا واحنا مب ناقصين
حمد: أقول نصووور... انت مواطن ولا زلمه ولا مواطن مجنس
ويضحكون على خالد
ناصر: مب راد عليكم ....
..
رجع بذكريات لأرض الواقع وابتسم وتم يطالع السما ويتأمل نور نجومها.. تذكر هادف.. ورد يطالع تليفونه شاف 5 مكالمات لم يرد عليها.. استغرب كيف انه ما انتبه على رنه التليفون.. وشاف ان سلطان متصل فيه.. على طول رد اتصل في سلطان عشان يعرف الأخبار..
ناصر: هلا.. ها طمني شو؟
سلطان: شو اقووول لك.. التهمه مثبته عليه.. البصمات وكل شي اتدل انه هو.. واهل الولد مب راضين يتنازلون لأن ولدهم شكله وايد تعبان..
ناصر: لا حول الله.. والحل احين؟
سلطان: شو اقول لك.. مادري احس راسي بينفجر.. اقولك من دشيت المركز الضباط كلهم يطالعوني بنظرات ربك لا يقول انه يمر عليك حد ويطالعك شراتهم.. يعني صدق حسيت بفشيله.. انا ضابط مكافحة الجرائم والمخدرات اخر شي يطلع ولد عمي مجرم..
ناصر:ماعليك من حد.. شو بتسوي تراه ولد عمنا لو شو ما سوى مانروم ننكره..
سلطان: صدقك.. بس ساعات ودك تزغده.. يعني عليه حركات الصراحه ما تتحمل.. لا ويا اهله ولا الي يسويها برع.. ما يفكر ها ولا شو؟
ناصر: انت شفته؟؟
سلطان: شفته .. وياليتني ما كلمته.. سود ويهي زود..
ناصر:!!!ليش؟
سلطان: يرفع الضغط ولا كنه مسوي شي.. يدافع عن نفسه بطريقه يا ناصر اتقول الي مسونه شي بسيط..
ناصر: الله يهديه.. على منو طالع مادري..
سلطان: ابوي وعمي يقولون انه طالع على عمنا فاضل المرحوم..
ناصر: ها الي يقولون اتوفى بحادث..
سلطان: ولو اني احس انه اكثر عن جيه.. لأن دوم يوم نسأل عنه يتهربون.. وبعدين ايام اول ماكان في حد يسوق الا نادرا يعني مادري انا شاك في الموضوع.. بس يالله طنش شو بتسوي
ناصر: صدقك انا بعد احس جيه..
سلطان: يلا انا وصلت البيت.. ابوي وينه؟
ناصر: مادري انا في غرفتي من وقت ما ظهرت انت ومادري عن حد
سلطان: خلاص عيل .. يلا باي
بند سلطان عن ناصر وما لحق يحط التليفون الا وسمع صوت صياح في البيت.. اتفاجأ.. شو السالفه؟؟ حد عرف شي ولا شو؟؟ طلع من غرفته يشوف شو الي صاير.. شاف كعادتها فدوى اخته من اتشوف فلم هندي تبدأ رحله المناحه عندها.. بس عاد هي تاخذ الأمر بجديه بحيث يعلى صوت صياحها.. تم يطالعها ويضحك على شكلها وتصرفها ونفس الشي جاسم ريلها..
ناصر: خبله والله..
جاسم: الله بلاني بخبله.. عاد الي يشوفها يقول بسم الله حد ميت
ناصر: ههههههه.. ايه انتي.. فر عليها الكوره الصغيره الي كان يلعب فيها عامر ولدها.. والله انه فلم مب صدق..
فدوى صدت صوب ناصر والدموع تارسه عينها: حراااااام .. ليش جتلوووه.. والله انه مظلوم.. انت شوف .. يوم بريتي سارت عند اجاي..
ناصر: بس بس.. خلاص مظلوم مظلوم ولا تزعلين.. عاد انتي لا تقعدين اتقولين لي القصه
جاسم: ههههه.. جنها ياهل يوم تتطالع فيلم هندي.. اما يوم رايقه مافي اعقل عنها.. ما ادانيها يوم اتابع فيلم ولا شي..
ناصر: المهم خلكم من الفيلم.. في شي حقيقي صاير احين اهم من هالأفلام كلها.. لازم نقعد كلنا انفكر شو انسوي؟
جاسم: شو صاير؟؟
فدوى: شو السالفه ناصر؟؟
ناصر راح عندهم وقعد حذالهم وخبرهم السالفه بالتفصيل.. فدوى وجاسم الصدمه كانت مبينه على ملامح ويهم.. أحمد دخل ويوم شافهم مجتمعين واشكالهم مندمجين والصدمه الي في ويهم وجدية ناصر في الكلام خلاه يحس ان في شي كبير صاير.. راح عندهم وسألهم فقاله جاسم الموضوع.. ونفس الشي أحمد انصدم بدوره ومب قادر يستوعب أي شي..
أحمد: لحظه لحظه.. احين السالفه هاي صدق ولا شو؟؟
ناصر: اسميك انت.. من الصبح قاعد ارمس وجاد في كلامي واخر اتشك في رمستي..
جاسم: بس ما توقعت ان هادف توصل فيه لدرجه انه يرتكب جريمه..
ناصر: لا انا شخصيا مب متفاجأ واحد مثل هادف يطلع من البيت ولازم يكون في مخباه سلاح ولا مسيل دموع شو تبا منه؟؟
فدوى: وعمي ومرت عمي يدرون؟
ناصر: لا ما اعتقد..
أحمد: خل أي حد يعرف الا هند.. ما بتتحمل الصدمه..
فدوى: فديتك والله بعده قلبك عليها..
أحمد: حالتها الصحيه يا فدوى
فدوى: ولا تنكر انك اتحبها؟
أحمد: هيه.. بس مب الحب الي انتوا مفسرينه.. هند انسانه شفافه.. مثل الزجاج بسرعه ترومين تدخلين واتشوفين الي في خاطرها.. وفي قلبها.. وبسرعه ينكسر بس الكسر ولا الخدش الي ايي عليها ما تنساه ويكون اثره سلبي عليها..
فدوى: هي والله.. ربي يشافيها ويعافيها
ناصر: انتوا الحين حلوا مشكله هادف عقب فكروا في غيره.. اهل الولد مب طايعين يتنازلون ابد
جاسم: هني كل شي يتعقد دام انه اهل الولد مصرين صعب اننا نقدر انسوي شي.. خصوصا ان التهمه ثبتت عليه
أحمد: أي واحد من ربعه؟؟ اتعرفه انت يا ناصر؟؟
ناصر: هيه محمد منصور.. ربيعنا.. ولد مسكين طيب.. بس من يوم ما رابع هالشله قام يتأثر منهم
أحمد: والله مشكله الربع الي يخربون .. هالأيام الواحد لازم ياخذ حذره يرابع منو ولا يبتعد عن منو
جاسم: هي والله.. بس وين ايامنا نحن.. ماشي شرات الي اشوفه احين.. كنا انشاغب بس ما انأذي حد
فدوى: الله يعين عمي ومرت عمي لا دروا شو بيسوون؟؟
ناصر: انا هذا الي شاغل بالي ومعور راسي..
طلع سلطان وابوه من المكتب وشافوا الكل متيمع..
سلطان: ناصر.. خبرتهم..
ناصر: هيه..
ضاعن بوسلطان: شوفوا يا عيال.. اذا اتصل عمكم ولا أي حد فيهم لا تقولون لهم شي.. واذا سألوكم عن هادف قولوا انه برع ولا أي حجه ثانيه بس لا تقولون لهم السالفه
أحمد: بس ابوي.. شو بنسوي احين.. التهمة ثابته عليه
بوسلطان: هي والله مشكله.. بس انا لو مني بخليه في السجن عشان يتأدب..
ناصر: مسكين محمد.. شو حاله احين؟
سلطان: انا زرت الولد.. والدكتور قالي انه حالته بدت تستقر.. لكنه بعده ما عدى مرحلة الخطر.. واهله كلهم يصيحون.. زغت اني اجرب واقول لهم ان هادف ولد عمي .. ما هان علي المنظر الي اشوفه حريم يصيحن..
فدوى: الله يشافيه.. بس دخيلكم رمسوا هل الولد حاولو وياهم.. حرام والله انا كل خوفي على عمي ومرت عمي المساكين شو ذنبهم..

[قمر وخالد للا بد]

المساكين شو ذنبهم..
بوسلطان: والله انهم رايتهم بيضا..دوم يحاولون ويا هالولد.. بس مادري ها كيف..
ناصر: على قولتكم طالع على عمي فاضل..
بوسلطان: الله يسامحك يا فاضل.. يوم خليت ولدنا يطلع عليك..
أحمد:عمي شو ذنبه.. اصلا يوم عمي توفى انتوا ما كنتوا معرسين حتى عشان نحن ننوجد..
بوسلطان: دخيلكم.. انا ساير احط راسي لأن راسي بينفجر..
فدوى: فديت ابوي انا.. سير ريح ابوي.. راحتك اهم عندنا..
بوسلطان:يلا تصبحون على خير..
سلطان: شوووف مثل ما قلت لك ناصر.. دووم من انييب طاري عمي ابوي يغير السالفه.. اكيد مسوي شي؟؟
أحمد: انا بعد حسيت جيه,..
جاسم: شوفيكم انتوا.. فكروا في الي نحن فيه احين.. وخل عنكم موضوع عمكم..
ناصر: صدقه جاسم..
الكل سكت على رنة التليفون..ونظرات الخوف والقلق من الرد باينه على ويوهم.. راح ناصر صوب التليفون ويوم اطالع في الكاشف شاف انها مكالمة من خارج الدوله..
ناصر: انا مب راد.. أي حد ثاني خل يرد..
أحمد: ولا انا.. ماروم الصراحه..
سلطان: مالت عليكم.. بهالطريقه بتخلونهم يشكون.. خوزوا أنا الي برد علي التليفون .
رح سلطان صوب التليفون ورد عليه.. : الوووو
كانت وداد على الخط الثاني.. ساد الصمت عليها يوم سمعت صوت سلطان.. ليش انت الي رديت.. ليش؟؟ ااااااااااه مابا .. الي فيني يكفيني .. دخيلكم حسوا فيي.. : الو..
سلطان حس ان قلبه بيطلع من مكانه من سمع صوت وداد.. حس نفسه ناسي كل شي.. ومحد في باله غير صوره وداد مرسومه جدام عينه.. متى بتحنين علي.. احبج يا بنت عمي.. : وداد.. اشحالج؟
وداد: بخير الحمد لله.. انت اشحالك.. ؟
سلطان: بخير ربي يعافيج ويخليج..
وداد: سلطان.. وين هادف اتصل على تليفون وكله مغلق وهاي اول مره يغلق تليفونه.. ما تدري وينه؟
سلطان حس كأنه ماي بارد وانصب عليه.. ما عرف شو يرد ولا شو يقول.. تم ساكت.. والكل يأشر عليه انه يرمس ولا يخليها اتشك..
وداد: سلطااااااااان.. شو صاير.. قول لي.. دخيلك لا تعب قلبي.. الي فيني يكفيني..
سلطان: وداد.. مب صاير شي.. بس كنت احاول اتذكر وين شفته.. هو مضيع تليفونه في البحر وهو كان يسبح ويا ربعه.. وتدرين اليوم خميس يعني باجر الجمعه مارمنا انطلع له بدل فاقد.. لا تحاتين
وداد: اششششوه.. والله ما طاع يهدى لي بال وانا اتصل والتليفون مغلق.. ها اخرتها بيذبحني..
سلطان: بسم الله عليج.. لا تقولين هالرمسه..
وداد: سلطان..
سلطان: نعم.. امريني.. وداد.. دخيلج.. مثل ما تبيني احس بقلبج.. انتي حسي بقلبي.. اتحسين بكل القلوب الا قلبي ساهية عنه ليش.. فهميني.. ؟
وداد: شوفيك انت... شو هالرمسه.. سلطان.. انساني..
ومالحق سلطان ينطق الا وسدت الخط بويهه.. فهو عصب وشل التليفون وضرب فيه اليدار.. وطلع من عندهم ودخل غرفته.. عمرها ما بتحس.. عمرها ما بتحس.. دايما جيه.. قاسيه وياي انا بالذات.. ليش انا شو مسوي لج..شو ذنبي اني حبيت بنت عمي وفضلتها على كل الحريم.. اااااه.. وداااااااد .. وداااااااااد وداااااااااد.. ليش ما يغيب طيفج من بالي.. ليش.؟؟
..
ألمانيا..
تمت وداد قاعده مكانها واتصيح.. ودخلت عليها هند وشافتها في هالحاله استغربت.. شو فيها؟؟ شو الي يخلي وداد اتصيح؟؟ ياترى شي صايب هادف.. الأهل هناك شي فيهم؟؟
هند: ودااااااد.. شوفيج؟؟
وداد: هند.. تعبت يا هند.. مب قادره اتحمل..
هند: بسم الله عليج شو فيج.. خبريني..
دخل عليهم سعيد وشاف هالمنظر.. ماهان عليه اخته الحبيبه وداد الحنونه اتكون في هالحاله.. قرب وقعد وياهم..
سعيد: شوفيج؟؟ خبرينا.. ما يهون علينا نشوف هاللآلئ تنزل من عيونج..
وداد: سلطان.. ليش دومي اجرحه؟؟ ما ودي بس غصبن عني.. لازم ينساني.
سعيد: وداد.. انزين شو الي يعيبه خبرينا.. ؟؟ هو يحبج؟؟ وشو الي يخليج تجرحينه؟
هند: صدقه سعيد يا وداد.. شو الي مخلنج ترفضينه..
وداد: ما تعرفون .. ولا في عمركم بتحسووون..
سعيد: انزين خبرينا.. ؟؟ شو الموضوع..
وداد: بس بشرط محد يعرف عن الموضوع غيركم,... لني حاسه بخنقه ما اقدر اني اكتم في نفسي اكثر من جيه
هند: ارمسي.. طلعي الي في خاطرج
وداد: اتعرفون مريم بنت خالته.. ؟
هند: هي بلاها..
وداد: اتحيدون من كم سنه ... يوم طاحت في المستشفى انها حاولت تنتحر؟
هند: هي احيد السالفه.. يوم كان مقرر انه سلطان يخطبج.. بس انتي على اخر لحظه هونتي..
وداد: هذا هو السبب.. مريم اعترفت لي انها اتحب سلطان.. وانها حاولت تنتحر يوم انها سمعت انه بيخطبني.. وخلتني اوعدها اني ما اخذ سلطان وانساه.. وعشان جيه من يومها وانا اصد سلطان
سعيد: شووووووو.. انتي خبله ولا شو.. اشعليج منها...
وداد: سعيد.. شو اشعلي منها.. تباني اكون سبب في موتها
سعيد: لا مب انتي ولا سلطان السبب.. السبب قلة عقلها.. غبائها.. ياهل.. هاي يوم بغت تنتحر كم كان عمرها.. 18 سنه.. يعني مراهقة..
وداد..: حتى لو.. هي اتحبه..
سعيد: شو اتحبه ما اتحبه.. وانتي بكيفج توعدينها.. ليش قلبج لهالدرجه طيب.. تحرمين قلبج من الحب الي نمى فيه من صغرج وتهدمينه بلحظه عشان خاطر بنت شرات هاي.. ياااااااهل.. اسمحي لي اقول لج يا وداد انتي الياهل مب هي..
وداد: بس مابا اكون سبب في ضررها..
سعيد: اقول انا ساير ارقد.. ماشي فايده من اني ارمسج.. اول مره احس بج ياهل يا وداد..
طلع سعيد والقهر متملك قلبه.. كيف تتنازل عن حبها لطيش مراهقة.. لييييييش؟
هند: لا تزعلين من سعيد.. تدرين فيه اشكثر يحب سلطان.. وحلم حياته انه يصير نسيبه.. خصوصا انج اتحبين سلطان بعد
وداد: هند.. انتي لو مكاني شو بتسوين؟
هند: الصراحه.. بسوي الي سويتيه.. ولو انه تصرف جنوني.. بس هالي اقدر عليه.. ما يهون علي وحده تتضرر بسببي.. بحس بتأنيب الضمير..
وداد والدموع تذرف من عيونها: افهميني يا هند.. والله اني تعبانه.. يوم عن يوم يزداد تعبي.. لاني قادره اوافق على انسان غير سلطان.. ولا قادره اوافق على سلطان.. شو اسوي.. فهميني..
هند: الله يهديها بس.. وسلطان شو رايه فيها؟
وداد: ما يحس بحبها رغم محاولاتها.. يعتبرها شرات اخته لفارق العمر من بينهم
هند: وهي لازم تضحي بحبها عشان سلطان.. لو صدق اتحب سلطان.. جان ما سوت الي سوته وحرمت سلطان منج..
دخلت عليهم غزلان وقطعت كلامهم.. : السلام عليكم.. بل.. شوفيكم سكتوا.. يعني ما تبوني اسمع رمستكم؟؟
وداد: لا بالعكس.. تعالي قعدي ويانا يا احلى غزاله في البيت,..
غزلان: ههههه.. وناسه.. لو سعيد ولا هدووف هني وسمعوج.. جان قطعوني..
هند: هههههه ما يحق لهم.. ما عندنا غير غزاله وحده..
غزلان: توني سمعت ابوي يقول انه بيجدم موعد التذاكر على اساس نرجع السبت
هند: احسن.. لأني بصراحه مليت.. ولاعت جبدي من قعده هني.. ابا ارد البلاد
وداد: انا بعد الصراحه.. وخصوصا يوم هادف مب ويانا الواحد ما يقدر يستانس..
غزلان: وانا اشتقت حق حصوووونه ربيعتي.. فديتها والله
وداد: هاج التليفون ودقي لها شو تتريين..
غزلان..: هي والله.. بس اخاف تكون راقده
وداد: لا ان شاء الله .. تدرين في البلاد الكل يسهر لوقت متأخر واحين يادوب الساعه 11 في البلاد
غزلان: هاتي .. بتصل. وبخليهم يوعونها.. ما يخصني انا مشتاقه لها الجلبه..
اتصلت غزلان .. ورد عليها عبيد.. ولد اخو حصه..
عبيد: الووو
غزلان: عبيداااااان.. حبيبي.. اشحالك؟؟
عبيد: اوه.. غزوله.. انتي اثحالث.. وينث؟
غزلان: انا في المانيا حبيبي.. بخير.. انت اشحالك؟
عبيد: بخير.. تعالي عندنا ابا اثوفث.. انا وااااااايد احبث..
غزلان: وانا بعد.. وين حصوووو؟
عبيد: حثوو.. تتطالع تلفثيون..
غزلان: ابيييييه احين بتضربك.. لازم اتقول عمووو ..
عبيد: مب كيفها..
حصه: شو فيك.. اتكلم منو انت؟
عبيد: اكلم حبيبتي.. ما يخثج..
حصه: هات.. ضربته على راسه وسحبت عنه السماعه.. الووو
غزلان: حصووووووونه حبيبتي..
حصه: هيييييييييييييييه.. ما اصدق.. غزلانووووووو.. اشحالج فديتج انا
غزلان: تمام.. وانتي اشحالج.. وحشتيني يالحماره..
حصه: عيل انا شو اقول ملاااااااااانه هني من غيرج.... تعالي بسج قعده هناك ما اشتقتي لي؟
غزلان: اففف وايد اشتقت لقعداتنا وسوالفنا..
حصه: فديييتج وانا بعد.. بسكم تعالو هني..وايد سوالف عندي ابا اخبرج عنها..
غزلان: وانا بعد والله .. بقولج مغامراتنا..
حصه: اقووووول.. يقولون شفتي روميو هناك؟
غزلان: شووو.. روميو.. ها احيده ماااااات من سنه سكتوا..
حصه: لا لا لا.. روميو اماراتي..
غزلان: الله يخس ابليسج.. تقصدين الله يذكره بالشر
حصه: خييييييبه قويه في حق اخوي الصراحه..
غزلان: وعععع.. كرهت عيشتي وطلعتي وكل شي فيني من شفته
حصه: اصلا تتمنين اتشوفين شراته
غزلان: اخبرج.. يلا باي.. خسرتيني.. اتصلت اسمع اخبارج مب اخباره
حصه: ههههههه فديتج والله .. لا خلاص كله ولازعلج.. اصلا هو الفير بيوصل.. راد البلاد عندنا خلاص.. خذي راحتج هناك
غزلان: ونحن بعد احتمال نرجع على يوم السبت
حصه: حلفي.. اللللللللللللله ونااااااسه
غزلان: والله ملينا من القعده هني
حصه: وشخبار هندوو؟
غزلان: الحمد لله.. المهم يلا ما بطول عليج.. برد البلاد.. اخبرج سويتي الي قلت لج عليه؟
حصه: افا عليج انتي بس..
غزلان: جيه اباج.. شاطره يلا سلمي على خالوو... وعلى عبيدان حبيبي..
حصه: تعالي حشرني كل يوم يسأل عنج.. اونه شاري لعبه يديده يبا يلعبها وياج
غزلان: ههه.. فديته.. شريت له العاب من هني بعد..
حصه: تسلم ايدج.. يلا مع السلامه
بندت غزلان عن حصووو .. ومسكتها وداد من جتفها..
غزلان: بسم الله .. خرعتيني؟؟
وداد: شو الي طالبته منها؟وتتخبرين اذا سوته ولا لا؟
غزلان: ماشي.. قلت لها تاخذ نوته وتكتب فيه كل يوم مع التاريخ من يوم ما سافرت لليوم الي برد فيه السوالف الي تستوي..
وداد: خييييييبه وكاله انباء انتي..
غزلان: لازم .. عشان ما اكون مثل البهيمه ما اعرف شي..
وداد: لا زين زين ماشاء الله الإخت أم هلال..
هند: ههههههه .. وحليلج يا غزلان..

[قمر وخالد للا بد]

بيت ثابت..
عادل: امووور.. مادري ليش هالبنت جذبتني بهالطريقه.. مع انها اصغر عني..
أميره وهي مب منتبهه لكلامه واتبدل في القنوات..
عادل: حوووووو.. اكلمج انا.. خلي عنج الريموت شوي..
أميره: هههههه.. سوري والله بس كنت مندمجه شوي. شو قلت
عادل: البنت الي قلت لج عنها.. وايد تطري لى بالي..
أميره: ابييييييييي.. عدووووول والله وقمت اتحب..
عادل: شو احب الله يهداج.. فسرتيها على حب..
أميره عيل شو تفسيرها يا فيلسوف.. ترا ماشي غيرها بنت شفتها وللحين كله اتفكر فيها
عادل: يمكن اعجاب.. مب حب..
أميره: ترا الإعجاب يتحول إلى حب..
عادل: يجوز..
ام عادل: عادل.. أميره.. انا سايره ارقد تامروني بشي؟
عادل نش من مكانه وباس راسها: فديتج يامي مابا غير سلامتج..
ام عادل: فديتك يمي.. ان شاء الله اتبوس الكعبه..
اميره وهي تركض اتدز عادل بعيد عن امها: خوز انت بس اتبوسها انا لازم احضنها وابوس هالخدود الحلوه وهالراس..
ام عادل: فديتج والله
ام عادل.. توفى زوجها يوم كانت اميره صغيره.. ومن يومها كرست حياتها لتربيه عيالها.. رغم انها مب كبيره في السن وايد .. عمرها 41 سنه.. رفضت كل من تقدم لها .. لأنها بغت تتفرغ لعادل وأميره .. فكانت لهم الأب والأم والإخت والأخ.. حبهم لأمهم يفوق أي احساس ثاني.. امهم تشتغل مديره في إحدى المدارس.. الكل يحبها .. لحنانها وطيبتها..
اميره: ربي يخليج لنا يا امي..
ام عادل: ولا يحرمني من عيال مثلكم..
اميره: امي... ترا ولدج عاشق..
ام عادل: هههه.. فديته ولدي والله كبرت.. وقمت اتحب وتعشق.. منو هي يمي.. خبرني عنها.. ودي اشوفك معرس والله
عادل: خيييييييبه.. معرس وعاشق مره وحده.. ماعليج من هالجذابه لا عاشق ولا شي
اميره: افا اتخش عن امي.. خل عنك.. انا بقولها.. نحن مب متعودين انخش شي عنها
ام عادل: عيل انا اليوم بسهر وياكم.. ماشي رقاد..
اميره: امي.. ولدج شاف وحده وعيبته ومن يومها مب قادر يشيلها من باله..
ام عادل: من هاي؟؟ اعرفها؟
عادل: ماعرف شي عنها.. بس انا اعرف ريل اختها كان استاذي في الجامعه.. والبنت عيبتني حسيتها صح صغيره بس محترمه ومؤدبه
ام عادل: اشكثر صغيره يعني؟
عادل: جيه امبين عليها في الثانويه..
اميره: امي.. لا تكون وحده من البنات الي عندج في المدرسه..
ام عادل: يجووز.. عطني اسمها وانا بشوف؟
عادل: ماعرف والله
اميره: مايبالها شي.. اتخبر عن اسم ابوها اقل شي.. وامي بتروم اظهر اسمها..
عادل: مادري بشوف.. بتخبر..
امير: الللللللله وناسه.. اخيرا
عادل: اخيرا شو؟
اميره: بتعرس.. وبلبس فستان وبكشخ..
ام عادل: والله لو بنت زينه واهلها ناس زينين.. ليش لا يا عادل... فرحتك تراها فرحتي..
عادل: ههههههه.. مستعيلين وايد..




الجزء ( 3 ) : للحب عنوان


ملخص الجزء السابق..: تدبر سلطان وابوه موضوع هادف الي في المركز.. واعتراف وداد بسبب رفضها لسلطان.. وقرار عادل بأنه يسأل عن حصه

في مركز الشرطه.. راح بوسلطان يقابل هادف ويكلمه..
بو سلطان: مسود الويه.. هاي اخرة سواياك يا هادف يا ولد اخووووي؟؟ .. يا فشيله ابوك فيك..
هادف: لا حول ولا قوة إلا بالله.. عمي.. اسمعني انا هالرمسه موووول ما تعيبني.. وبعدين انا ما سويت شي.. ييت ادافع عن نفسي.. وليش هو يغلط علي.. يستاهل الي اييه..
بوسلطان: تف عليك من ريال.. هاي مريلتك .. السلام يا ولد خليفه.. وهاي الطريقه المثلى في الدفاع عن النفس يا فهيم زمانك..
هادف: لو سمحت عمي.. عندك شي مهم تبا اتقوله قوله.. ما عندك.. خلاص
بوسلطان: الله الله .. ماشاء الله عليك.. اصفق لك..
دخل سلطان عليهم وشاف هالجدال.. ما قدر ايود اعصابه.. كان بيجرب منه وبيضربه بس منعه ابوه..
هادف: اسمعني انت يأشر على سلطان.. انا ابوي ما ضربني.. اتي انت اونك تستريل علي.. ؟
بوسلطان: وهاي غلطة ابوك.. انه ما صفعك.. يمكن كنت بتوعي من الي انت فيه..
سلطان: اخبرك.. انا كنت ناوي اساعدك.. وكنت ياي ومستانس لأن اهل الولد وافقوا على التنازل .. يعني كنت بتظهر.. بس احين عقب الي شفته وسمعته منك.. مابخليك تظهر..
هادف من سمع هالرمسه زاد غياضه.. لكنه مغرور ما بين هالشي: شو يعني.. عادي ترا الولد ما مات.. يعني ما بنعدم وانا بعدني ما كملت 18.. يعني كلها كم سنه وبطلع.. عااااااادي
بوسلطان: ايا الظالم.. وامك وابوك.. وهند المسكينه.. ما فكرت فيهم شو بيصيبهم..
هادف: هههههههه.. اتصدق عمي ضحكتني.. شو بيصيبهم يعني.. ليش هم مفتكرين فيني اصلا
سلطان: ايا يا ناكر الجميل.. انت تدري الدلع الي دلعوك فيه.. محد لقى شرواك.. وتدري انهم حارقين تليفوناتنا بس عسب يطمنون عليك..
هادف.. : اقول انا تعبان.. عندكم شي مهم..
بو سلطان حس بتعب.. وحس ان قلبه بدا يقبضه.. وانشلت حركه ايديه وريوله.. وبدى يعرق ما لقى عمره الا وطايح على الأرض.. وسلطان على طول لحق على ابوه..واما هادف فكان يطالع بنظرات لا مبالاة ورد ويا الشرطي لداخل السجن.... اما سلطان فطلب الإسعاف ونقل ابوه المستشفى..
..
في ألمانيا..
غزلان و وداد وامهم كانوا يلمون اغراضهم لأنهم بيردون البلاد.. وسعيد يلم اغراضه والحزن في عيونه.. لأنه ما بيرد البلاد وياهم.. هو راح يرد استراليا لأنه دراسته راح تبتدي..
غزلان: سعييييييييييييد.. قاعد سرحان جيه في البلكونه.. وماعندك شغل. تعال ساعدنا شوي..
سعيد تم ساكت وما رد عليها.. استغربت غزلان.. شو الي خلا سعيد يسكت عنها.. وهو بالعاده يدور اللحظه الي يتقارض فيه وياها..
غزلان قربت منه وقفت حذاله وحطت ايدها على جتفه: شو بلاه اخوي سرحااااااان.. في شو يفكر
سعيد: ااااه يا غزلان.. بتوحشوني.. تدرين اني في اخر سنه.. يعني ماشي مجال اني اييكم في الإجازات.. لأن ضغط الدراسه كبير..
غزلان: ما عليه.. ان شاء الله بترجع لنا بالسلامه.. وبتمر عليك الأيام جنها الا البرق.. انت هد عمرك وبالك..
سعيد: غزلان.. حطي بالج على هند..
غزلان: افا عليك.. شو هالرمسه.. هند في عيونا كلنا..
سعيد: لا تخلين هادف الغيور هذا يغصص فيها.. تدرين به مينون.. وعقله مب في راسه..
غزلان: بس .. تامر امر..
سعيد: وحطي بالج على عمرج ودراستج.. وامي وابوي.. طيعيهم ولا تزعلينهم..
غزلان: سعيييييد.. شو بلاك.. رمستك غريبه.. دومك اتسافر وما اتقول هالكلام.. اشمعنى هالمره
سعيد: تبين الصدق.. انا حاس ان في شي .. وخايف على امي وابوي..
وداد دخلت وسمعت رمسه سعيد: شي مثل شو يا سعيد؟؟
سعيد: وداد.. مادري والله.. بس قلبي قابضني..
غزلان: ما عليك.. يمكن من الضيق انك بتسافر ونحن بنسافر بعد.. ليش انك بتفارقني مثلا..
سعيد: لا عاد في هاي صدقتي.. فراقج انتي صعب جدا.. مافي حد اتقارض وياه..
غزلان ما قدرت تتمالك رغبتها في الصياح.. نزلت منها الدمعه وحست بحرقتها على خدها..
سعيد: لا .. مابا اشوف هالدموع
وداد: ولا نحن نبا انشوف الحزن في عيونك ياخوووي..
سعيد.. : وداد.. طلبتج..
وداد: انا حاسه شو بتطلب.. عشان جيه ما بقول تم..
سعيد: حرام عليج.. فكري فيه.. لا تعذبين الريال مب زين..
وداد: هالشي راجع لي في النهايه..
غزلان: ماعليك .. بتم على راسها لين ما تقتنع..
وداد: لا والله شاطره اونج.. اوكي..
هند كانت تنادي على غزلان.. من سمعتها ربعت صوب غرفتها..
غزلان: خير..
هند: ماشي مكان حق البوت ها.. خليه عندج
غزلان: زيغتيني غربلج الله.. اتحريت شي.. اخر شي تبين مني احط لج البوت في شنطتي.. ما اقول غير مالت على ويهي..
هند: ههههههه.. يلا شلي بلا رمسه زايده..
..