قـال الـذي يقـرا بليـا مكاتيـب
ياللي تقرون العمـى مـن عماكـم
ياعيالي اللي تشرفـون المراقيـب
تريضوا لي واقصروا في خطاكـم
خذوا كلام الصدق ما بـه تكاذيـب
مثل السند مضمـون للـي وراكـم
ياعيال لا صرتوا ضيوف ومعازيب
ترى الكلام الزيـن ملحـة قراكـم
وتروا السبابة من كبار العذاريـب
وهرج البلايس ما يطـول لحاكـم
المذهب الطيب هو مذهب الطيـب
والمذهب الخايـب يبـور نساكـم
ياعيال مـا سرحتكـم باللواهيـب
ياعيال ما عمـر المعـزب ولاكـم
ياعيـال ماضربتكـم بالمشاعيـب
ولا سمعوا الجيـران لجـة بكاكـم
ياما توليـت القبايـل تقـل ذيـب
من خوف لاينقص عليكم عشاكـم
أحفيت رجليني بحامـي اللواهيـب
وخليت لحم الريم يخالـط عشاكـم
ياعيال دوكم لحيتـي كلهـا شيـب
هذا زمـان قعودنـا فـي ذراكـم
قمت اتوكا فوق عـوج المصاليـب
قصرت خطانا يوم طالـت خطاكـم
لابد يـوم عـاوي دونـي الذيـب
القبر ما افرق طيبكم مـن رداكـم
ماني بفاضحكم بوسـط الاجانيـب
اعمالكـم يـدرون كـل اقربـاكـم
لوكان تدرون الـردى والمعاييـب
صرتوا مع المخلوق مثل خوياكـم
خوالكم بالطيب تـروي المغاليـب
ولو تتبعون الجـد محـدن شناكـم
وش علمكم يا تاركيـن المواجيـب
حسبي عليكم هالردى ويـن جاكـم
قصيتكم واسندت وادي سلاحيـب
ولقيـت بالصبخـا مدافيـق ماكـم
ياعيال بعتوني بصفـر العراقيـب
ما هي حقيقـة سـود الله قراكـم
يالله عسى اعماركم شمسها تغيـب
يعتـم قمركـم ثـم تظلـم سماكـم
يا علكم فـي حاميـات اللواهيـب
ياللي على الوالـد خبيـث لغاكـم
شفت الجفا والحيف والغلب والريب
ضلوعكـم لابيـض الله قـراكـم
عسى نساكم ما تحمـل ولا تجيـب
ولا حدن من البزران يمشي وراكم
اخسوا خسيتوا يا كبـار اللغابيـب
اهبوا هبيتـوا يقطـع الله نماكـم
مواقع النشر