تجربتي في الزواج وانتقل زوجي من حال الى حال..!

**حنــ الصمت ــين** · 04-06-2009, 11:04 AM

السلام عليكم ورحمة الله وبركاته

كيفكم ان شاء الله تمام

انا شفت مواضيع خواتي اللي يتشكون من ازواجهم انه يضرب ويخون ويسكر و...و....الخ

فحبيت اني اقولكم قصتي

وارجو انكم تستفيدون منها

وتدعوا لي بالهدايه وحسن الخاتمه

بسم الله

انا تزوجت وعمري 14 سنه ماكنت اعرف في الحياه شي فما بالكم بالزواج

زوجني ابوي غصب عني

عشان سهرت عند صديقتي الى الساعه12:30

وقال عشان تتعلمين درس

الله يسامحه وش هذا الدرس الل مستحيل ينتهي

انا مااقول اني مو مرتاحه بالعكس مرتاحه اخر راحه مع زوجي يخليني اطلع مع صديقاتي واسهر معهم

بس كنت اتمنى اني اكون الحين بالجامعه واكمل طموحي

المهم

زوجي كان يضربني ضرب مو صاحي سبب لي كسر برجولي مره ورضض بيدي مره ونزيف باذني مره

وغير الاورام اللي كانت تجيني من الرفس وتصقيع راسي بالجدران <<<تقول جالس يحارب يهودي

ههههههههههههههه

المهم وكان يسافر للبحرين ويعرف بنات وامه الله يسامحا كانت تساعده

وخواته بعد الله يسامحهم

ومرت الايام وحملت وجبت ولد والحاله مستمره سفر وبنات وضرب

حبوب صباح ومساء وليل هههههه

وجت فتره بعد ماجبت بنت قلت خلاص انا مااقدر اتحمل

طبعا ابوي واخواني مايبغوني اتطلق يقولون المرأه مالها الا بيت زوجها و.. و,,, يعني افهميها وانقلعي وكانوا مايكلمون زوجي ولا يقولون لاتضرب ولا شي

حسيت اني من جد ضاااايعه مالي احد وامي متوفيه

واخواني وابوي اللي هم اهلي مايبغوني اتطلق ويبلشون فيني

وكنت بنفجر من الهم وكنت ادعي ليل ونهار ان الله يفرج لي همي

لااله الا هو وحده لاشريك له وهو على كل شيء قدير

جلست اضرب راسي يمين يسار ابغى اوصل لحل

وفجأه....

امطرت السماء افكارا

ومسكت قلم وورقه

وبدأ التخطيط

اولا: لاتحسسين زوجك انو ماوراك احد يعني قوليله اهلي موجودين ويبغوني اذا انت ماتبغاني ولاتحسسينه انه سواء ضربك وسوالك بتجلسين عنده لانو ماعندك احد

وهدديه انك بتروحين بيت اهلك
يمكن تقولين انه بيفرح لانه بياخذ راحته بس صدقيني انه مهما طال الوقت بيرجع

ثانيا:اذا سوا حاجه زعلتك ازعلي لاتبينين له وتحبسين نفسك بالغرفه لالا تكلمي معه بس من دون نفس يعني هو مثلا بيقولك حاجه ومتحمس ويبغاك تتفاعلين معه وتتشققين من الضحك بس انتي وريه غير كذا قوليله ايوه اها طيب بدون ابتسامه
واكيد الرجال عاد وطبعه العسل بيقول وش في اخلاقك كذا قولي انا مافيني شي ليه؟ بيقول طريقة كلامك قولي له لا عادي مافيني شي وذكريه باللي سواه وانتي ثلج يعني لاتعصبين لا خلييك بااارده ادري بتحترقين جوا بس تحملي.. شتمك؟ اشكريه.. قام عنك راح لفراشه او طلع من البيت خليه يطلع بيرجع ويحاول يصالحك بطريقته

ثالثا: يبغى يسافر؟ خليه يسافر وقولي له انو احتمال انتي تسافرين بعد سواء لحالك او مع اهلك ((ادري انه مستحيل بس حاولي تبينين له انك صادقه))واذا ماعندك تصريح قولي اخوي او ابوي او اي احد من العايله يقدر يسوي لي تصريح من دون موافقتك (بس لاتقولين هذا الشي اذا كنتي متزوجه واحد من العايله..اذا من العايله حطيها باهل صديقتك او حاجه كذا) هنا هو بيخاف حتى لو راح بيروح وهو قلقان وبيرجع بسرعه او انه كل شوي بيتصل فيك.. واذا كلمك وهو مسافر لاتشتغلين شغل المحقق كونان وينك ووش تسوي لالالا

اول مايكلمك قولي الو هلا اخبارك تمام اوكي انا لازم اسكر بعدين بكلمك اوكي حياتي يلا باي امممووواح وسع صدرك وسكري..اذا دق لاتردين طنشي الجوال ارسل لك رسايل تهديد ردي ولا بالعن والديك طنشي .. واذا خلص من السفر ورجع لازم يرجع ويشوفك كاااااشخه ومجهزه له احلى جو..
واذا سألك ليش مارديتي قولي لا بس كنت مشغوله مع العيال عيالك سوو كذا قولي له اي شي وخليه يحس انك تكذبين عليه..لاحس بكذا بينشب لك مابيفضى يسوي حركات الخيانه والسفر بيشك فيك انك تخونينه ومارح تمر خمس دقايق الا وهو متصل عليك من الدوام او وهو طالع مع اخوياه واذا كان زوجك من النوع اللي يعصب انك تمسكين جواله او تفتشين باغراضه عامليه بالمثل اذا مسك جوالك سوي مثل حركاته لامسكتي جواله عصب عصبي واذا سألك ليه قولي انت قدوتي فبيحاول شوي شوي انو مايعصب عليك اذا مسكتي جواله او فتشتي اغراضه

يعني بدل ماتكوني انتي الضحيه خليه هو الضحيه

بتقل سفراته شوي شوي..

رابعا: ضربك وتحملتي ياحياتي مره ومرتين وعشر وعشرين
تحملي في البدايه ولاتقولين لاحد انو يضربك واذا كان مسويلك علامات ملاكمه بوجهك لاتطلعين ابدا من البيت..اذا سألك قولي لاني دايم اتكلم عند الكل انك احن واعظم رجال وماابغى اخرب صورتك.. بيحس بالذنب.. واذا هو ماعنده احساس وكررها فوق الثلاث مرات شيلي قراشيعك وطيري بيت اهلك..اذا كنتي تقولين انو مايوديني روحي انتي..واذا قلتي مافي احد يوديني روحي بليموزين.. واذا قلتي اخاف بيت اهلي بعيد..اهم شي تستري زين..واذا على البعد انا بيت اهلي يبعد عن بيت زوجي 400كلم.. ورحت مع عيالي لحالنا.. بس لا زم بعد اخر ضرب اكلتيه تقولين له انك بتروحين عند اهلك.. طبعا هو بيستهين فيك.. لاتخلينه يستهين فيك ابدا ..انتظريه يطلع من البيت وروحي عند اهلك.. حتى لو كانو متضايقين من وجودك ولاتدقين عليه ابدا اول ماتوصلين بيت اهلك ارسلي له رساله قولي انا ببيت اهلي.. ولاتفكر اني بارجع لك.. طبعا بتبدأ اتصالاته عليك..خليه يتصل لما يشبع ولا تردين.. بيسوي فيها بعدين انو مو مهتم وماراح يدق عليكخليه براحته وحاولي انك تضيعين وقتك مع اخوانك.. واذا احد من اخوانك تكلم قولي له هو زوجي وانا اللي بعيش معه طول العمر مو انتوا..يعني خلوني اتصرف وماعليكم..

طبعا انا جلست شهر كااامل ببيت اهلي طبعا انا ماكنت مرتاحه هناك بس اللي يبي الدح مايقول اح
تحملت..وتحملت..وهو خذ راحته بالبدايه ماسأل ولاشي..بعد شهر ارسل رساله مااشتقتيلي ياام عيالي؟
مارديت عليه
ارسل احبك واموت فيك و...و..
وانا مطنشه
ارسل وارسل وارسل ينتظر مني اتصال بس خاب ظنه مسكين..

ماقدر يتحمل قام يتصل..طبعا انا يوم شفته يتصل حطيته عالصامت وبالشنطه وبالغرفه..وانزل لاخواني وسوالف وضحك
رجعت للغرفه بعد 3ساعات تقريبا

تتوقعون كم اتصال لقيت؟؟

لقيت

ماراح تصدقون..

324مكالمه..

ادري ماراح تصدقون بس والله انو هذا اللي صار

عاد اختكم يوم شافت المكالمات هذي كلها تشققت من الفرحه

ورسايل انا مااقدر بعادك وماادري ايش

ارسلت له انا ماانفع لك

روح للي كنت تروح معهم وتجي

روح لخوياتك..

قال انا ماابغى الا انتي وبس

طبعا رديت عليه برساله وحده بس

وزادت الاتصالات يوم شاف الرساله

وطنشت ونمت وصحيت وعلى هذا الحال لمدة 3 ايام بعدها ارسلت له اذا انت تبغاني انا ببيت اهلي تعال وتفاهم مع اخواني

ارسلت له هذي الرساله الفجر

وصحوني اخواني الصبح يقولون زوجك عند الباب

وانبسطت انا

وخليت اخوي يروح يكلمه ويقول له اني انا تعبت منه وماابغاه..

قال والله ماراح امد يدي عليها ولا راح اخونها ولااسافر والله

وقام يبكي عند اخوي .. اخوي كسر خاطره وجاني وقالي حرام عليك

المهم سحبني اخوي ودخلني للمجلس عشان اتفاهم معه

ودخلت وماناظرته وجلست وانا ساكته لا ابتسامه ولا يحزنون

قمت اقول لاخوي انه سوالي كذا وكذا وماكنت اقول لاحد لاني احبه بس هو مايستاهل الحب و.. و.. منهالاكلام اللي زي السم

اعتذر لي قدام اخواني وحلف انه مايغلط علي مره ثانيه

قلت انا ماراح اقبل اعتذاره ماابغاه وقمت

جاني اخوي وقال خلاص ارحميه يكسر الخاطر

قلت لا اذا من جد يبغاني قول له يراضيني...

كيييف؟؟

جهزت قائمه..

قلت يدفع لي 10000 رضوه

يشتري لي طقم ذهب

مايسافر

مايخون

من العمل للبيت ومن البيت للعمل

مايضرب

مايقذف

ويوم شافها اخوي قال الله يلعن ابليسك لو انه يروح يتزوج اصرف له

وقال ترى يمكن انه من جد مايوافق ويروح يتزوج وحده ثانيه بس انا عارفه زوجي وانا اخبر فيه

طبعا اللي بتسوي كذا لازم تكون عارفه زوجها زين وتسوي هذي الاشياء حسب شخصية زوجها

المهم راح اخوي وقرأ ازوجي االشروط

وزوجي من دون تفكير او نقاش قال ان شاء الله

ورجع لي بعد 5 ايام وحو جايب المبلغ والذهب وهدايا ثانيه

وقلت ماراح ارجع له>>>حلت لها السالفه

لابس ماابغى ابين له اني ابغى ارجع

انا رجعت له بس بينت له اني اساسا ماكنت ابغى ارجع بس عشان اخواني غصبوني

ورجعت للبيت .. طبعا معاملتي له مختلفه 180 درجه

يعني مااسولف مااضحك بس قايمه بكل واجباتي له

واذا قالي وش فيك قلت انا هنا عشان اربي عيالي

ماابغى عيالي يضيعون من غير اب او ام

والله بعدها جوازه عندي مايروح مكان الا لازم يقول لي

يحبني دايم يطلعني نتعشى برا البيت

والله انه اي مكان بيروح له غير الدوام ياخذني معه

وشوي شوي بديت ارجع مثل ماانا

وهذا كله من فضل الله سبحانه ثم تخطيط المرأه

كيد النساء والله عظيم

تذكري الرجال يختلفون يعني بعضهم فهيم ومايحتاج كل هذا وبعضهم يحتاج بس على خفيف
وبعضهم اذا كان غبي يحتاج دبل

هذي تجربتي الشخصيه

اتمنى اني اكون فدتكم

واتمنى تدعولي بالهدايه وحسن الخاتمه..

**سمرقمر** · 04-06-2009, 04:06 PM

ان شاء الله حبيبتي يتم معاك على كذا طول حياتك لكن الخوف انه يرجع لان من شب على شي شاب عليه
لان في ناس تتوب حق الله وترجع ترتد ترجع على حالها الله يتمم عليك ويسعدك كمان وكمان وانا كمان اعرف حريم سو كذا حق ازواجهم ورجعولهم حريم من قربتي لحس انها بيفقدها رجعلها وهيك والحمدلله على زوجي الله يخليه لي تاج فوق راسي انا عكسك لمن اروح لاهلي يعني زياره ويحطني يرفض يروح لاهله الا وانا معه بس في اوقات اقوله روح لاهلك لمن والله انه يروح واهو كان شي ناقصه مره يبين عليه اوقات يجلس عندي ويخذ فندق لمن اخلص زيارتي عند اهلي كم يوم لاني مني في منطقت اهلي بعيده من منطقه تانيه ولاجي اهلي غير في الاجازه الكبيره يروح يجلس يدق على في الطريق قبل يوصل لان اهله في منطقه تانيه وكل يوم يدق وكل وقت من يوم ماصبح لين الليل والله بدون مبالغه ويمكن عشان انا مني رومنسيه كثير لدرجة اقوله دق مره في اليوم يكفي انا مني طول الوقت عند التلفون والله من جد حتى انه مو متعود على جلوسي عند اهلي ولمن يروح حق اهله في مدينه تانيه تقول امه والله انه طول الوقت سرحان ولا يجلس يتكلم معنا مو زي لمن انت معه وتقول والله مايفرح الا لمن تنتهي زيارتك حق اهلك وترجعي رومانسي كثير خخخخخخ