كلمة بنت في مجتمعا يغلب عليها معنى البكر ولا ترتبط بسن معين .........
وعلى هالاساس دخلت ادردش معكم بوضوع اتمنى تاخذوه برحابة صدر ....
انا متزوجة وام وعلى هالاساس مستبعدة من قائمتكم لكن ما يمنع اسير عليكم ؟!
في همسة ودي اقولها للبنات بشكل عام واللي تقدم بهم السن من دون زواج بشكل خاص ...
تدرون وش هي ؟
( انا اقصد بعض البنات مو الكل حطي فبالك هالكلام قبل تقري الموضوع والا فيه بعد زوجات اخوان الشياطين تتبرا من افعالهن )
كثير من زميلاتي المتزوجات يشكون من معاملة اهل الزوج ...
واذا حاولنا نعرف السبب نلقى ان الام والاب غالبا طيبين وخاصة الاب لكن الله يصلحهم البنات وخاصة غير المتزوجات هم اللي يثيرون المشاكل بانتقاداتهم وتدقيقهم وتدخلهم احيانا ....
احيانا هالتصرف يصير من البنت حتى لصديقتها اذا تزوجت قبلها .........
طبعا انا ادري هالشي غالبا يصير غصب عن البنت خاصة اذا تاخر بها سن الزواج ما عاد تلقى شغل غير اللي حواليها وخاصة اللي حصلو الشي اللي هي ما حصلته ......
فليش حبيباتي ...
وين الايمان بالقضاء والقدر صحيح ان الزواج نعمة ومن اكبر النعم بعد لكنه مو كل شي بعدين والمشاكل والظلم الي يصدر من بعض البنات لزوجات اخوانهم او صديقاتهم بيتحاسبون عنه يوم القيامة ويمكن حتى لو دعت عليك وحدة منهم يستجيب الله لها ويحرمك الزواج والذرية
والله وحدة من زميلاتي بالعمل تحكي انها تزوجت ولد عمها وكانت صغيرة وجاهلة وخواته متعلمات وموظفات وهي رغم جمالها الباهر وطيبتها ما عجبتهم
ظلوا يحشون وينتقدون ويعايرونها بجهلها رغم ان اخوهم مو ذاك القد ...
الى ما طلقها وهي عمرها 15 سنه ومعها ولد رضيع وكملت دراستها وتوظفت وتزوجت مليونير ارمل ومبسوطة معة وهم تدرين وش صار ...
تقول صديتقي ما تركتهم من الدعاء عليهم ووالله ولا وحدة شافت الذرية يتصلون عليها بعد اكثر من15 سنه يطلبون السماح لكن ما قدرت
تقول وانا مقدرة شعورها :( حرموني زوجي اول حب فحياتي
وحرموني ولدي وخله يعيش مشتت بينا ا وبعد ما كبر انا انحرمت منه)
واخو هالبنات زوجوه مدرسة جلست معه 6 شهور وطلبت الطلاق وجالس الى الان بلا زواج
شايفين الظلم وش يسوي ...
هذا غير عقاب الاخرة
لا تقلبون عليها مثل بعض الاخوات الله يهديهم يبعدون عن المشكلة الاساسية ويتكلمون في الاحتساب والصبر والخ
انا معكم بس الناس قدراتهم على الصبر متفاوته ودعوة المظلوم مستجابة وعشان كذا ربي شرعها وجعلها من اسرع الدعوات استجابة ليس بينها وبين الله حجاب
حبيباتي
خلوا ايمانكم بالله قوي ترى الرضى والخلق الحسن له اثر عجيب على النفس يغسل الهموم ويريح الخواطر
سامحوني على صراحتي لكن ارجو منكم التقبل والتاني قبل ما تردون
والله يحفظكم ويرعاكم ..........
مواقع النشر