أخواتي الحبيبات هذي السنه الثالثه لي في بريطانيا صدق انهم اسلام بلا مسلمون راح ادخل في الموضوع سيدا باقي لنا تقريبا سنتين ونرجع السعوديه والله اني حزينه على فراق بريطانيا ليه؟؟؟؟؟ مو لجمال الطبيعه والجو عندهم لا والله لكن من النظام يمكن عندنا نظام في السعوديه لكن ماعندنا تطبيق للنظام بأذكر لكم مواقف كثييييييره بس عشان ابين لكم النظام عندهم اول شئ وهذا عقدتي في السعوديه البريد ؟؟؟؟لازم تكون الشوارع عندنا مقسمه صح والبيوت مرقمه وعليها رمز بريدي بحيث لاقدر الله لو جاء حريق سرقه احد مصاب يحتاج اسعاف ندق على 999 ونقول نحن في الشارع الفلاني الرمز كذا ورقم البيت كذا وماياخذ دقيقتين بالكثير والا المطلوب واصل سواء اسعاف او الدفاع المدني باقلكم مواقف مره ولدي الصغير تشنج
طبعا اول سنه من وصولنا وماكنا نعرف نظامهم بس عارفين انه لو نبغى اي شئ ندق على 999 وهو بيبلغون اللي نحتاجه سواء بوليس او دفاع مدني او اسعاف المهم تو ولدي متشنج في يدي وابوه نط على تليفون البيت دق عليهم انا في الشارع الفلاني الرمز كذا ورقم البيت كذا والله والله انهم وصلوا وهو ماسك التلفون مامداني البس عبايتي ؟؟؟؟؟؟؟؟؟؟؟؟؟ ليه اولا لانهم متواجدين في كل مكان ثانيا لان الشوارع منظمه ثالثا النظام في الشوارع لو سمعت صوت بوليس سيارة اطفاء اسعاف جاي من بعيد تجنب سيارتك على جنب عشان تتيح لهم المجال يوصلون المره الثانيه بنتي انفتح من فوق عينها طاحت عالدفايه قبل يدق عليهم زوجي قال البسي العبايه تلاقينهم تحت واقفين يستنونا
هههههههه ماشاء الله طبعا ماخيطوها لا غروها بغراء عشان مايشوهها والان لها سنه اختفت نهائيا ماشاء الله ومره زوجي قاعد في البلكونه الا يشوف زي النار الصغيره في اسفل الشجره تحت العماره شكله واحد رمى سيقاره ودق عليهم وقالهم ورا المبنى في نار صغيره وانا وياه نراقبهم جو ونزلوا للنار وطفوها هي كانت مره صغيييره بس لو قعدت اكيد بتكبر وجلسوا يدعسون على شررها بجزمهم عشان تطفى وماراحوا الا لما تأكدوا انها انطفت طبعا ماسألو زوجي مين انت وش اسمك
جو طفوا وراحوا هذي بعض فوايد الرمز البريدي ولاتنسون اي طلب تبغوه من النت يوصلكم لعند الباب اقضي كل جمعه من النت مقاضي السوبر كامله وتوصلني اليوم الثاني عند الباب فواتير التلفون والكهرباء مواعيد المستشفيات الجامعات اي شئ عالبريد طبعا ماراح احصي فوائده لكن بانتقل لكم على نظام ثاني وهو نظام المستوصفات والمستشفيات ليه في السعوديه نتجه للمستوصفات الخاصه مع ان الحكوميه ببلاش ؟؟؟اولا بسبب المراجعات المتأخره الانتظار ماباقول الممل لا الانتظار المميت
صراحة اللي يجي 7 الصباح ويدخل للطبيب 12 الظهر ؟؟؟؟؟؟؟؟؟؟
في بريطانيا صحيتي وولدك لاقدر الله او بنتك تعبان مزكم عنده كحه اي شئ خفيف تدقي عالمستوصف في وقت المواعيد اللي هو من 8 الى 9 الصباح فقط ساعه تدقي وتقولين ابغى دكتور اطفال عشان كذا وكذا اذا كان العارض خفيف يقولون مثلا تعالي بكره الساعه 9 و45 تجين من بكره الساعه 9 و40 دقيقه وانتي قاعده في صالة الانتظار 9 و45 والطبيبه تناديك لو نادتك 9 و46 تقعد تعتذر لك يعني يضيع من يومك 5 دقايق انتظار !!!!!!
ولو المرض طارئ ودقيتي عليهم تقولك تعالي الان الطوارئ وتلاقي الطبيب في انتظارك كانه مافي مريض غيرك ولاتنسون المترجمه لو طلبتيها تجي معاك على حسابهم اما المواعيد الثانيه والمراجعات والتطاعيم لاتدورون عليها لا تجيكم على البريد في البيت اليوم الفلاني الساعه الفلاني تطعيمة ولدك فلان حابه تأجليها دقي علينا وهذا كله في العام مو في الخاص السعوديه حتى الخاص عندنا لازم انتظار ويعطوك رقم مره دقيت على مستوصف خاص ابغى احدد موعد مع دكتوره نسائيه قالت لا لازم تجينا قلت طيب عندي ملف عندكم قالت تعالي هنا ونعطيك رقم !!!!!
ولايفوتكم العام حددت موعد مع مستشفى الجامعه الحكومي في جده كاتبين الموعد 10 و45 في رمضان طبعا كنت حامل قلت لزوجي ماشاء الله صارت مواعيدهم بالساعه شكلهم تأثروا من المبتعثين للخارج وصاروا يطبقون النظام طبعا جينا من 10 ونص ونستنا مر الموعد مرت 11 مرت 12 اذن الظهر ماحولك احد قبل واحده تقريبا دخلت ؟؟؟؟؟؟؟؟
نروح من انظمة المستشفيات لأنظمة المرور مافي احد يسوق السياره بدون رخصه لو ايش والرخصه اش طريقتها تجيب مدرب يدربك بالساعه كم تقريبا 6 ساعات وتعرف كل انظمة المرور هنا بعدها يجي واحد يختبرك نجحت في الاختبار تاخذ الرخصه مانجحت تعيد الين تنجح طبعامافي واسطه لازم تكون متقن للسواقه مبدع مو اي سواق اللي يقطع الاشاره مايقولون على جنب لا الكاميرا تصور ويرسلون على بريدك صورتك وانت مسرع والضريبه حقتك طبعا تاخرت في سداد الضريبه يزودونها هل في احد بيقطع الاشاره بعدها ؟؟؟؟؟
في اماكن حاطين كاميرا للسرعه عند المدارس والمستشفيات والمنتزهات واهم شئ البوري ممنووووووووووووووووووووع ثلاث سنين عمري ماسمعت صوت بوري سيارهلدرجة كنت افكر انهم مايركبون بواري في سياراتهم احترام للغير غير طبيعي هدوء فضيع تنام في عز النهار مافي ازعاج واللي يدق بوري لغير حاجه مااااااااااااسه يدفع ضريبه نجي لمقاعد السلامه وهذي اهم نقطه في انظمة المرور عندهم الطفل الين عمراعتقد 12 سنه لازم مقعد سلامه ولدي من عمره شهر جبته هنا ممنوع منعا باتا اخذه في حضني قدام لا قاعد ورا في مقعد السلامه حقه طبعا يشبه الهزازه مثبت بطريقه امنه للطفل اصلا انتي ترتاحين من قعدته في حضنك طول الوقت واذا بكى او يبغى شئ ترجعي معاه ورا الين يسكت وترجعين بس تاخذيه قدام ممنوع صراحة ارتحت من عيالي كل واحد مربط بحزامه مو زي السعوديه اقعد يافلان يابنت ارجعي ورا والله فاكره مره سافرنا كلنا العايله قدام انا وعيالي الثلاثه في حضني ليه ؟؟؟؟؟؟ كنت انا وولدي نونو في حضني وصدمنا في جمل بس ربي ستر وجت على بابي وطاحوا بناتي اللي كانوا ورا عند اماكن رجولهم
هههههههههه
طبعا لو كانوا مربطين بالاحزمه في مقاعدهم بعد الله ماكان طاحوا كم من حادث يكون السبب في وفاة طفل انه طار برا السياره طيب ليه طار ؟؟؟؟؟؟؟؟؟؟؟
لي ثلاث سنين عمري ماشفت سياره هنا مصدومه وهذا يختصر كل اللي قلته
نجي لأنظمة المدارس الطفل في المدرسه هو في بيته الثاني لايمكن المعلم يرفع صوته على الطفل او المعلمه احترام للطفل غير طبيعي موتخيلوا اذا بعاقب بناتي اهددهم اني بغيبهم من حبهم للمدرسه
التعليم مرتبط عندهم بالمرح بناتي يجون معاهم بس قصه يقرونها بس مافي دفاتر مافي كتب كله في المدرسه لدرجة اول سنه قلت بنتي تداوم تلعب بس وتروح ونهاية السنه نادونا عشان يعلمونا بمستواها ووروني كل اوراقها ودروسها انصدمت متى درست كل هذا عبالي بس القصه لدرجة عندهم جيولوجيا سنه اولى ابتدائي ؟؟؟؟؟
الطفل من سنه اولى الين رابع مايطلع الا في يد امه كل فصل عليه معلمه مسؤوله تطلعم طابور في حديقة المدرسه وتسلم كل طفل لامه واللي فوق 10 سنوات معاهم ثنتين لابسات سترات صفراء يقطعونهم الشوارع الين يصيرون بأمان طبعا النظام في كل شارع مدرسه فطبيعي بيوتهم كلهم قريبه
مجلس الامهات ؟؟؟؟؟؟؟؟؟؟
عندنا مجلس الامهات حفل واكل وبعد الحفل تسالين المدرسه كيف بنتي ممتازه
هنا مجلس الامهات يرسلون لك في اليوم الفلاني الساعه الفلاني تعالي تجينهم شوفي هذا كل اللي تعلمت بنتك السنه هذي وبنتك مستواها كذا وكذا مشكلتها تستحي مررره متعقده من بنتي خجوله هههههه
مره ارسلوا لنا بنتك تكتب باليسار ويدها غير متوازنه في مسكة القلم وكلمنا استشاريه لهذا الموضوع وبتشوفها هل لديكم مانع ؟؟؟؟؟؟؟؟تصدقون
طبعا في يوم لتكريم الطلاب والطالبات وكل الاهالي يحضرون وكرموا بنتي لانها نشيطه مع اصحابها وتتقن لغتين العربيه والانقليزيه ماشاء الله ولا انسى الرحلات في المدارس ياكثرها رحلاتهم التشجيعيه اللي تحبب الاطفال في الدراسه
نجي للباصات بعد كل 40 متر تقريبا موقف للباص تنتظري الباص فيه وانتي بتكوني عارفه الباص رقم كذا يوصل للشارع الفلاني او تقريه عالباص كل 10 دقايق يمر باص يوصلك للمكان اللي تبغيه اذا تبغي تذكرة يوم كامل يعني تدخلي كل الباصات ب3 باوند تقريبا وتلفي المدينه كامله لو بس تبغي طريق واحد باوند وشويه طبعا أمان والباص يكون دورين ومعزز بكاميرات ماحد يقدر يسوي لك شئ هذا اللي اتمناه يكون عندنا في السعوديه بدل سواقة المرأه للسياره واهم شئ الالتزام بالمواعيد مكتوب على موقف الباص الباص رقم كذا يوصل بعد دقيقتين مثلا
أخيرا لو كل فرد فينا حاول يطبق النظام عندنا ومايقول كل الناس كذا يعني انا اللي بيغير دستورهم ؟؟؟؟
نفسي يوصل صوتي لكل مسؤول في كل قطاع ويحاول يغير من انظمته ويشدد فيها والشعب نفسه يحاول يغير نفسه لدرجة ان الشخص فينا يربط حزامه اذا قرب من نقطة التفتيش واذا راح شاله ؟؟؟؟؟؟؟؟تضحك على نفسك والا عالمرور طيب هم حاطين ضريبه عشانك انت عشان تسلم لاقدر الله لو جاك حادث حتى لو خفيف المستشفيات عندنا مية ممرضه حوالين الدكتور كأنه ملك والجواري حوله اسفه عالكلمه هذي لكن هذا الحاصل والادهى والامر انهم مع هذه الكثره يأخرون المرضى اللي برا والله اني ماعمري لقيت هنا دكتور معاه ممرضه في نفس الغرفه الدكتوره بنفسها تقوم تناديك من غرفة الانتظار وبنفسها تفحصك ؟؟؟؟؟
المستفيات قديمه وصغيره لكن كل شغلهم عالكمبيوتر لدرجة لما تشنج ولدي وديناه بالاسعاف على مستشفى الاطفال وبعد اسبوع كان عنده تطعيمه في المستوصف اللي جنب البيت سألتنا الدكتوره كيفه بعد التشنج ؟؟؟؟؟؟؟؟؟؟؟؟
كيف عرفتي ؟؟؟؟؟
المستشفى ارسل لنا تقرير بحالته؟؟؟؟؟
سبحان الله نحن المفروض اللي يتقيد بالانظمه عشان نتقدم
قال صلى الله عليه وسلم (كلكم راع وكل راع مسؤول عن رعيته )
لو الاب قيد اولاده بالنظام والام بناتها والمعلمين والمعلمات وكل المسؤولين كان نحن بخير وحابه اضيف اضافه ذكروني فيها الاخوات الابتسامه وما ادراك مالابتسامه عندهم شئ مقدس في كل الدوائر والمحلات بتعاملهم اللبق وباسلوبهم الراقي يخلونك تشترين وانتي مغمضه
وفي الختام
السلام عليكم ورحمة الله وبركاته
تعقيبي
للامانه هذا الموضوع منقول وماجعلني انقله لكم لان نحناج لهذا القونين التي يستخدمها الغرب
ونستفيد منها ونحنوا اولا بهذا
حقآ اسلام ((( بلامسلمين)))
رد مع اقتباس
مواقع النشر