للعبره، يمهل ولا يهمل
السلام عليكم أخواتي،
انا من زمان ما شاركت باي موضوع لكني اليوم حابه اطرح عليكم ثصة للعبره بس لأن الله يمهل العبد ولكن لا يهملة ابداً، سبحانك يا رب تعطينا المجال للتوبه مرات ومرات ولكن العبد دائما يغتر بنفسة ولا يستحي وإليكم بالضبط ما حصل.
كانت لي صديقة اسمها ( غ ) منذ ايام الدراسة انقول من ايام الإبتدائي كنا شله كبيرة تضم 10 بنات تقريبا شله فرفشة دائما كنا نضحك ونسولف ونتقشمر ونشارك بعض همومنا ولا نفترق الصبح المدرسة والعصر ويا بعض.
المهم تخرجنا وإلي اشتغلت وإلي تزوجت وهذا حالنا للحين مع بعض وكانت هاذي الصديقة اول وحده تتزوج، وكلنا حسدناها كانت ملاك وهي بالفستان الأبيض، وبعد الزواج جاها الحمل والولاده فكان هالولد ولد الكل، ومرت السنوات وتزوجنا الوحده بعد الثانية، ومرات ومرات انا كنت الاحظ ان صديقتي ابتدت تتغير شوي شوي احسها مو ذيك البنت الخجوله لا صارت جريئة وقامت تتكلم عن حب واشياء قمت الاحظها واستغربها فيها وطبعا كنت اصبر نفسي واقول يمكن ظنون ولكن وبعد فترة اكتشفت انها كانت تحاول وبأي طريقة انها تجرب الحب واعشق وبعد اكثر من هذا كان خاطرها البنت انها تجرب الجنس قبل ما تتزوج ضحكت وكنت اقول شفيها استهبلت ولحد هاذي المسألة ما فيها شي كل انسان من حقه يحلم قلنا حلم.
بعد فتره طويلة التقيت بنت من ايام المدرسة وكانت مفاجأه اني شفتها طبعا اهي تدل بيتنا دعيتها تجي لي البيت واصريت وبالفعل جاتني البيت على الغذاء وقعدنا نسولف ونضحك وفي الكلام جابت لي موضوع الأخت ( غ ) وقعدت اتسولف وفتحت الموضوع على الأخر وقالت لي ان ( غ ) لها علاقات وغراميات وجنس وفلوس وغيره طبعا انا طول فتره الكلام حلجي مفتوح وعيني مبققه مب مصدقة إلي قاعده اسمعة وكل شوي اردد على مسامعها شنو منو تقصدين من وهي تكرر علي فلانه وصدمتني اكثر لمن قالت لي انها على علاقة مع اكثر من واحد وقاعده ما تضيع وقتها تقسمة بين اكثر من شخص وطبعا اهي تاخذ مقابل، والأدهي ان الأخت طلعت مسوية علاقة مع زوج وحده من الأهل يعني الأثنين متزوجين طبعاً انا ما عرفت شنو اسوي في هاذي الحالة طلبت اصدقائي وقلت لهم اجتماع ضروري واجتمعنا وقلت لهم السالفة والموضوع من أ إلى الياء وخيرتهم بين ان احنا نحدد علاقتنا فيها او ان احنا نواجهها بالموضوع ونوقفها بعد ولكن الأغلبية قالو لي انهم كانو يدرون عنها وكلموها كذا مره وما نفع معاها الكلام فقرروا انهم يبتعدون عنها.
وانا بعد حاولت اني انصحها ولكنها كانت تقول لج انها تدري انها غلطانه وراح تبتعد عن هذا الدرب وراح تشوف شلون تقدر تصلح امورها، ولكن من اهي مجرد كلمات وتخدير ليس إلا.
بعد فتره مب طويلة يعني كم شعر انقول وصلني خبر ان الموضوع وصل لبيتهم وعرفوا كل السالفة وحتى زوجها عرف بالموضوع.
يعني شوف قدرة الله اهي حصلت لها ناس ينصحونها والله عطاها الفرصة انها تصلح حالها واحوالها بدل المره 100 مره ولكن للأسف اهي عمت عيونها الفلوس والجنس واللعبة وهذا كان مصيرها . ما عندها ربع وما عندها اهل يثقون فيها وسمعة ما فيه يعني خسرت كل شي تقريباً.
ادري اني طولت عليكم وسمحوا لي وادعوا لها ولجميع المسلمين بالهداية
تحياتي
ايفيتا
رد مع اقتباس
مواقع النشر